Beyglur með rauðlauksosti, skinku og spínati

Þetta er ákaflega einfalt en svo gott.  Hrærið saman rjómaosti og söxuðum rauðlauk, blandið þurrkuðum basil við og svörtum pipar. Smyrjið ristaðar beyglur með ostinum, setjið skinku og spínat yfir. Ég er yfirmáta hrifin af lauk og þess vegna elska ég þennan rauðlaukost.

Forskot á jólabaksturinn Krúsakökur

 

             

2 1/2 bolli hveiti

2 bollar haframjöl

2 bollar sykur

250 gr smjörlíki/smjör mjúkt

2 egg

2 tsk lyftiduft

1/2 tsk matarsódi

1 bolli saxaðar rúsínur

200 gr súkkulaði saxað

Þurrefnunum blandað saman í skál, eggjum,smjöri er blandað við. Mér finnst best að nota fingurna í þessa vinnu. Kreista og klípa deigið þannig að smjörið og eggið bindi restina vel saman. Hnoðað og svo mótað í nokkrar aflangar jafnar lengjur og sett í kæli. Ég geri deigið oft að kvöldi og baka svo daginn eftir. Skera lengjurnar í jafna bita, móta bitana með fingrunum og setja á bökunarklædda ofnplötu. Þær stækka töluvert í ofninum svo það borgar sig að hafa nægt rými á milli þeirra.

Best er að baka þær í miðjum ofni við 175 gráður í 10 mínútur.

 

Þessar kökur eru betri ef þú bakar þær ekki of lengi, hafa þær ljósar þegar þú tekur þær út, þá eru þær stökkar að utan en "chewy" að innan. Það verður bara að prufa sig með fyrstu plötuna því þetta fer allt eftir því hve stórar kökurnar eru. Í þetta sinn gerði ég þær reyndar risastórar eins og bakarískökur svo þær voru 25 mínútur í ofninum og  voru um 4 sm að þykkt þegar ég setti þær inn.

Verði ykkur að góðu!

Sparnaðarskinka

Mér finnst svo blóðugt að kaupa skinku í bréfi sem er hálft bréf vatn og kílóverðið á við fínasta nautakjöt. Svo við hjónin fjárfestum í ódýrum skurðarhníf fyrir 2 árum,hann borgaði sig upp eftir 3 skinkur. Ég hef aldrei verið hrifin af þessarri farslíku brauðskinku sem seld er í búðum heldur alltaf litið hýru auga til betri skinku. Sú er auðvitað seld örfá stk í bréfi á himinháu verði. Við grípum því alltaf til þess ráðs að kaupa góða skinku þegar hún er á tilboði og sjóðum,sneiðum og frystum. Kílóverðið er að minnsta kosta 1000kr lægra og við fáum skinku sem bragð er af. Það er alltaf plús í mínum kladda að þú finnir skinku bragð af skinkunni.

Eggjakaka með rauðlauk,beikoni og bönunum

 4 egg

1/2 rauðlaukur saxaður

3 beikonsneiðar steiktar og saxaðar

hálfur banani í sneiðum

4 tsk af kryddjurtaosti eða rjómaosti

Eggin hrærð saman. Örlítil olía hituð á pönnu og rauðlaukurinn steiktur þar til hann verður mjúkur. Eggjunum hellt yfir, beikonbitunum stráð yfir og 4 klípum af rjómaosti. Bananasneiðum raðað yfir allt saman.

Magnið miðar við litla ommelettupönnu.

Verði ykkur að góðu!

Eggaldin tortilla með byggsalati og kotasælu

Ísskápurinn er hálftómur og þá er góður tími til að hreinsa til. Taka út allar krukkurnar og skoða hvað er enn í lagi. Henda ónýtum mat og útrunnum sósum. Og fara svo að kaupa inn.

Þetta var afgangur úr hinu og þessu. Hálft eggaldin, rest af tómat tapenade frá Sacla, kotasæla á síðustu metrunum og gamla góða byggið.

Ég elska bygg. Þetta ástarsamband hófst í vor og logar enn. Ég borða næstum aldrei hrísgrjón eða venjulegar kartöflur lengur en byggið kemur í staðinn fyrir...ja allt. Það er ódýrt og hreinlega þjófstartar meltingunni hjá manni sem er aldrei slæmt. Ég sýð yfirleitt 4 dl af byggi í 12 dl af vatni og hendi einum grænmetisteningi út í. Læt suðuna koma upp, lækka og læt sjóða í 15 mínútur með lokinu á en slekk svo undir og læt það bíða í 8 tíma eða yfir nótt.(það er líka hægt að sjóða í 40 mínútur og þá er það tilbúið. Þetta magn dugir okkur Ottó vel í nokkra daga.  Ég  bæti svo hinu og þessu út í eða ber það eins og er. Það sparar mikinn tíma þegar til lengdar er litið að vera með byggið. Það geymist soðið í ísskáp í viku. Svo tek ég bara hluta út, bý til salat úr því eða hita það og bæti kannski elduðu grænmeti við.

Að þessu sinni skar ég niður tómata og reif niður parmesan og blandaði saman við og pipraði smá. Blandaði smá sítrónusafa,olíu og balsamic dropa saman og hellti yfir.

Makaði tómat tapenade  á eggaldinsneiðarnar og steikti á pönnu. Setti svo kotasælu á helming tortillunnar, svo eggaldin og endaði með bygginu. Tilbúið!

Hafragrautur og bananar

Ég gleymi því aldrei hve illa mér var við hafragraut í æsku. Mamma reyndi hvað eftir annað að koma honum ofan í mig. Þykkur vellingur, ósætur með mjólk var álíka óspennandi og að borða kork. Svo ég tali ekki um allar bækurnar sem ég hafði lesið þar sem hafragrautur kom við sögu, alltaf var hann þykkur, vondur og hreinlega eins og búinn til fyrir fátæk börn. Ég spurði mömmu auðvitað hvort við værum fátæk, ég held hún hafi samt aldrei tengt þessa spurningu mína við morgunmatinn. Það var ekki fyrr en ég var í Noregi að sumarlagi að vinna við garðyrkju sem mér tókst að taka hann í sátt. Við vorum 4 vinkonurnar og ætluðum að spara hverja krónu svo við ættum nógan pening yfir veturinn í skólanum. Hluti af þeim sparnaði var að borða hafragraut í hvert morgunmál. Mín lausn við þessum viðbjóði var að salta,sykra og þynna grautinn vel. Smám saman tók ég hann í sátt þar til ég borðaði hann með bestu lyst og saknaði hans hreinlega þegar ég var komin heim til Íslands og byrjuð í skólanum aftur.  Í dag get ég borðað grautinn eins og hann er, án sykurs og salts en hver er hamingjan í því? Krydd í tilveruna. Það er nokkuð til í því. Það þarf ekki mikið til svo úr fábrotnu hráefni verði meistaramatur.

Hafragrjón og vatn eru sett í pott, magnið fer eftir því hve þykkan þú vilt hafa grautinn. Það er alltaf hægt að bæta vatni í .Salt fyrir þá sem vilja.

Soðið í nokkrar mínútur. Sett í skál og þurrkuð trönuber og sneiddir bananar settir út í. Kanil stráð yfir.

Það er hægt að vera skapandi og nota hvaða ferska eða þurrkaða ávexti sem er.

Börnin eru sérstaklega hrifin af því að sjá liti og formin ofan á  líka, ekki bara falið inni í grautnum.

Svona er hægt að elska hafragraut, sætan og fallegan og allt með náttúrulegum sykri. Nammi namm....

Sá stutti fer bráðlega að smakka hafragrautinn en lætur sér nægja bananann þangað til.

Njótið!

Avókadó með tómötum og myntu

Fallegur morgunmatur eða forréttur.

1 avókadó skorið í tvennt og steinn fjarlægður

1 tómatur,fræhreinsaður og skorinn í bita

smá rauðlaukur fínt saxaður

nokkur myntulauf

Ég blanda saman 1 tsk af basil ólífuolíu, nokkrum dropum af balsamik ediki,1/2 tsk sítrónusafa,1/2 tsk hunangi eða maple sírópi. Helli helmingnum yfir avókadóið. Set svo tómatbitana og laukinn saman og ofan í holurnar og myntulauf yfir. Helli svo afgangnum af olíuleginum yfir.

Ég fékk mér þetta í morgunmat með appelsínusafa, sem sagt alger c-vítamínsbomba í morgunsárið.

Hyvää ruokahalua!

Beikonvafin grísasnitzel með döðlu gráðosta fyllingu

Þetta er alveg skotheld uppskrift, það er ekki hægt að klúðra þessu. Grísasnitzel eru hræódýr þessa dagana en hægt er að búa til svo girnilega rétti úr þeim. Titillinn sagði í rauninni allt sem þurfti.  Það þarf grísasnitzel, beikon,döðlur og gráðost og grófkorna sinnep.

Það þarf bara að smyrja smá gráðosti á snitzelið, steinhreinsa döðlurnar og skera niður og raða ofan á ostinn. Rúlla snitzelinu upp og smyrja það með sinnepinu, ekkert vera nískur á það. Taka svo 2 beikonsneiðar og vefja utan um snitzelið.

 

Et voilá!  Þessi sætu grísarúllur bíða þess að komast í ofninn. Það nægir þeim 20 mínútur við 205 gráðu hita. Í þetta sinn bar ég rúlluna fram með grilluðu grænmeti og spínati.

Ég skar niður gulrætur, sætar kartöflur og papriku í grófa bita. Skar lauka í tvennt og dreifði með ásamt nokkrum hvítlauksrifjum. Bætti við nokkrum sveskjum og stórum bitum af epli. Dreifði basil ólífuolíu yfir og velti öllu saman og kryddaði með ítölsku kryddi. Setti í eldfast mót og álpappír yfir, bakaði í ofni við 200 gráður í 40 mínútur, tók álpappírinn af og lét það vera í 15 mínútur í viðbót. Tíminn er svolítið afstæður, fer eftir stærð grænmetisbitanna. En þetta fór mjög vel með grísarúllunum, eplin og sveskjurnar eiga alltaf vel við svínakjöt.

Þetta er algert partý fyrir bragðlaukana!

Guten appetit!

Safaríkar og seiðandi plómur

Það er eitthvað við plómur. Þær eru bústnar, mjúkar og safaríkar og mér verður alltaf hugsað til endurreisnartímabilsins þegar ég borða þær. Það hangir uppi olíumálverk af plómum í stórfenglegum gylltum ramma í stofunni hjá mömmu. Málverkið kemur frá ömmu og afa og hefur alltaf verið í bakgrunninum eins lengi og ég man eftir mér. Lýsingin minnir á Rembrandt málverk, djúpir skuggar og plómurnar svo eðlilegar að mig langar að teygja mig inn málverkið og stela einni.

Ég keypti stóran pakka af plómum um daginn og hef ekki getað látið þær í friði.  Ef ég borða þær reglulega þá bæta þær meltingafærin, hjálpa við inntöku járns í líkamanum, hreinsa blóðið og það eru minnkandi líkur á hjartasjúkdómum, ristilkrabbameini,astma,beinkrabba og gigt. Þegar þú bætir því við að það er lítil fita og fáar kalóríur í hverri og mikið C vítamín í þeim þá væri það hreinlega glæpsamlegt að borða þær ekki.

Svo ég komi mér nú að máli dagsins þá sit ég veik heima með veikt barn og þá er bara eitt sem ég alltaf geri í veikindum... ég baka.

Ég hef það samt einfalt í þetta sinn og held mig við þemað... plómur.

Plómu svindl

1-2 plötur frosið smjördeig

8-15 þroskaðar plómur, fer eftir stærð

2 msk fljótandi hunang

1-2 msk möndlulíkjör eða annar eftirlætislíkjör

Skerðu steininn úr plómunum og sneiddu þær. Hitaðu ofninn í 200 gráður.

Flettu smjördeigið út og brettu upp á deigið við endana og mótaðu kant. Gott að nota smávegis vatn til að festa kantinn. Settu deigið á bökunarklædda plötu.

Leggðu svo plómusneiðarnar ofan á deigið, passaðu að leggja þær ekki of þétt ofan á hverja aðra, þá er hætta á að deigið verði of blautt.

Blandaðu svo hunangi og likjörnum saman og helltu í mjórri bunu yfir plómurnar. Það er gott að geyma örlítið af því og hella svo yfir þegar bakan kemur úr ofninum.

Settu í miðjan ofn við 200 gráður í c.25 mínútur eða þar til smjördeigið er gyllt á lit.  Þær eru góðar heitar og kaldar og alveg hreinlega guðdómlegar með góðum vanilluís.

 

This is just to say

by William Carlos Williams

I have eaten

the plums

that were in

the icebox

and wich

you were probably

saving

for breakfast

Forgive me

they were delicious

so sweet

and so cold

Fiskur í raspi indian style

Mikið er fiskur dásamlegt hráefni, það eru hreinlega óendanlegir möguleikar til að matreiða hann.

Þetta er skemmtilega fersk blanda af engifer,hvítlauk,chili,chili dufti,kóríander laufum og sítrónusafa.

Hægt er að nota þorskstykki eða lúðubita eða í raun hvaða fisk sem er sem er svolítið stífur.

4 msk olía

125 gr kókosflögur eða kókosmjöl

5 sm ferskur engifer,saxaður

1 stór laukur fínsaxaður

4 hvítlauksrif fínsöxuð

2 ferskir grænir chili, saxaðir

1 tsk chili duft

2 msk fínsaxaður ferskur kóríander

4 msk sítrónusafi

5-600 gr fiskstykki

salt

Hitið olíuna á pönnu og setjið lauk,hvítlauk,engifer,chili,chiliduftið og kókos og steikið á meðalhita þar til laukurinn mýkist. Bætið þá sítrónusafanum og kóríander út í og saltið ef þarf. Látið malla í 5-10 mínútur er þar til kókosinn er farinn að taka lit og mýkjast. Það þarf að standa við og hreyfa í reglulega þar sem það er ekki mikill vökvi.

 

Setjið smá olíu í eldfast mót og setjið smá hluta af kókosblöndunni neðst, fiskstykkin næst og svo alla blönduna ofan á fiskstykkin. Setjið í forhitaðan ofn á 160 gráður í 20-25 mínútur eða þar til fiskurinn er tilbúinn. Þetta er algert nammi. Borið fram með fersku brakandi salati.

Þetta var maturinn í kvöld.

Döðlu og tómat chutney

Fyrir þau okkar sem elska allt sætt þá er hér gróft og gott chutney. Ágætis tilbreyting frá algengara meðlæti eins og mango chutney eða lime pickle.

250 gr döðlur, steinhreinsaðar og skornar í litla bita

575 gr tómatar í dós

1 laukur, fínsaxaður

3.5sm biti af fersku engifer, saxað

1 tsk chili duft

1 tsk salt

6 msk edik

Settu allt heila klabbið í pott og hrærðu vel. Láttu suðuna koma upp og svo minnka hitann niður í 3-4, láttu malla í c.45 mín án loks. Hrærðu af og til í þar til það þykknar.
Ef þú vilt fá aðeins sterkara chutney þá bætir þú bara við chili dufti og salti eftir smekk. Döðlurnar gera þetta mjög sætt svo það er gott að vega upp á móti því með chili.

Þetta nægir fyrir 4-6
Undirbúningur 10 mínútur
Eldun 45 mínútur

Indverskir dagar....

Við erum á 23 degi indverskra daga á Bjargartanganum. Indverskur matur eldaður frá grunni í kvöldmat alla þessa daga. Mmmmmm...
Við fáum ekki nóg og því höldum við bara áfram. Enn er Ottó ekki farinn að svitna gulu svo við erum í góðum málum. Það eru svo margar góðar uppskriftir en ég hef ekki myndað neitt fyrr en núna. Þessi réttur er fínt meðlæti með mörgum réttum eða bara gott grunn karrí í aðalrétt. Þetta er bragðgóður karrý grænmetisréttur, ekki of sterkur.





Balti blandað grænmeti

Notið hvaða grænmeti sem bester í það sinnið. Saxið það í frekar smáa teninga svo það taki ekki oflangan tíma að sjóða. Þetta er mild blanda af engifer,chili,kóríander og turmeric. Auðvitað getið þið verið gjafmildari með chili duftið ef þið viljið aðeins meiri kraft.

2-3 msk olía
1 lítill laukur,saxaður
1-2 hvítlaukar pressaðir
2.5sm ferskt engifer, rifið
1 tsk chili duft ( ég set 2tsk)
2 tsk kóríander duft
1/2 tsk turmeric duft
500 g blandað grænmet (ég notaði núna gulrætur,sætar kartöflur og frystar grænar baunir, það er hægt að nota kartöflur,blómkál ,rófur...)
2-3 tómatar, húðlausir og niðurskornir eða 4 msk sítrónusafi
salt

Hitið olíuna í stórri pönnu/wok eða þykkbotna potti og steikið laukinn á meðal hita í 5-10 mínútur eða þar til hann er farinn að brúnast eilítið. Bætið hvítlauk,engifer, chili,kóríander,turmerc og smá salti út í og steikið í 2-3 mínútur í viðbót. Bætið þá niðurskornu grænmetinu út í og steikið í 2-4 mínútur í viðbót.

Bætið annað hvort tómötunum eða sítrónusafanum út í .Hrærið vel og bætið örlitlu vatni út í.
Ég var með tómata úr dós og notaði allt úr dósinni og svo dass af sítrónusafa að auki.

Setjið lok yfir og látið malla í 10-12 mínútur eða þar til grænmetið er orðið meyrt, bætið vatni út í ef þarf svo grænmetið festist ekki við botninn. Tíminn fer eftir því hve stórt grænmetið er skorið.

Hægt er bera fram með naan eða chapatis

Múffur fyrir alla, konur og karla,krakka með hár og kalla með skalla

Ég veit ekki hve oft ég hef bakað múffur úr þessarri uppskrift. Ég rakst á hana í Gestgjafanum og hún klikkar hreinlega ekki. Grunnuppskriftin er fljótleg, einföld og þarf ekki meira en hráefni,skál,sleif og handafl. Jú og að sjálfsögðu múffuform og ofn.

Múffur grunnuppskrift

280 gr hveiti
30 gr sykur (má sleppa)
2 1/2 tsk lyftiduft
1/2 tsk salt
Þessu er blandað saman í skál.

1 egg
2 1/2 dl mjólk
60 gr brætt smjör
hrærið þessu létt saman í annarri skál

Hellið vökvanum út í hveitiblönduna og hrærið varlega, í mesta lagi 20 handtök. Deigið á að vera kekkjótt.
Smyrjið múffumót eða notið pappírsform og bakið í 20 mín við 200 gráður. Ég mæli með því að nota múffumót fyrir 12 múffur og pensla létt með olíu, þannig steikjast múffurnar vel undir. Deigið er akkúrat fyrir 12 múffur. Grunndeigið er best borðað samdægurs en ef það er meiri matur í þeim þá eru þær góðar næstu 2 daga líka. Ef ekkert er sett í þær þá eru þær tilvaldar með smjöri, osti og sultu eða hvaða áleggi sem er.

Hægt er að setja allt mögulegt í deigið, á myndinni fyrir ofan eru múffurnar með hindberi og súkkulaðibitum. Þá set ég deigið í formin og sting svo einu hindberi í hverja múffuskál og ýti nokkrum grófsöxuðum súkkulaðibitum ofan í. Þessi útgáfa er best strax eftir bökun.




Þetta er pizzamúffa, sem alveg bráðnar í munninum á manni. Ég set 1-2 tsk af heitu pizzakryddi frá pottagöldrum, slatta af rifnum osti (allt eftir því hve mikið er til) en kannski c.50gr. Set svo kannski skinku, pepperoni eða grillaðar papriku smáttsaxaða út í. Ég set þetta í grunnuppskriftina þegar ég er kannski búin að hræra 15 sinnum í hana og hræri síðustu handtökin með þessu í. Skammta svo í formin og baka kannski 5 mínútum lengur því múffurnar verða stærri og matarmeiri.
Þessar eru hrikalega góðar í morgunmat eða brunch. Þær frystast vel og þú getur hitað þær snögglega í ofni og þær eru eins og nýbakaðar.


Verði ykkur að góðu!

Enn um teboðið...

Krúttkökurnar geta auðvitað verið með hverju sem er.
Þessi fyrir ofan er með sama svampbotni en hérna marði ég hindber í rjómann. Setti örlítið ofan á og svo þessi pínulitlu jarðaber sem eru að lauma sér milli steina í garðinum hjá mér. Einfalt en gott. Svo er ómissandi að hafa girnilegt te með herlegheitunum. Dekka borð með blúndudúk og nota fína stellið. Það er bara synd og skömm ef blessað stellið er bara viðrað á hátíðsdögum.

Spúsi vildi halda enskt teboð...

Það var síðsumars og spúsi vildi halda enskt teboð.
Ég greip hugmyndina á lofti og ákvað að baka litlar kökur og smyrja gúrkusamlokur.

Kökurnar urðu algerar krúttkökur og komust léttilega fyrir í lófa manns.

Þetta er ákaflega auðvelt í framkvæmd og einstaklega ljúffengt í munni. Hver biti er svo lítill og syndsamlegur.


Notaðu glas til að stinga út hringi úr svampbotnum. Þeyttu rjóma og settu smá möndlulíkjör eða möndludropa í hann. Sneiddu banana í sneiðar. Leggðu bananasneiðar á neðri svamphringinn, rjómann ofan á það og að lokum er seinni svamphringurinn settur ofan á. Ég bræddi súkkulaði og sullaði ofan á og skreytti með rifsberjum úr garðinum.

Hér er uppskrift að einföldum en góðum svampbotnum- 2 stk meðalstórir
4 egg
200 gr sykur
60 gr kartöflumjöl
60 gr hveiti
1 tsk lyftiduft

Settu mjöl,hveiti og lyftiduft í skál. Þeyttu saman egg og sykur í hrærivél þangað til það verður létt og ljóst. Bættu þá þurrefnunum út í smátt og smátt. Smyrðu lausbotna form og helltu deiginu í þau.
Bakað í miðjum ofni við 175 gráður í 15-20 mínútur. Mismunandi eftir ofnum.

Það er hægt að stinga út 4-6 litla hringi úr hverjum botni, fer eftir því hve stórt glasið er að sjálfsögðu.

Bon apetit!